٢٠٠٧/١٠/٣٠

بيتاجرو بالقرآن


العواف عليكوا كلكوا



والله الحقيقه مش عارف ابدأ منين

بس في الفتره الاخيره لاحظت بعض الاعلانات الغريبه عن الاعشاب الطبيعيه الي بتساعد علي الانجاب والي مستخرجه من خيرات الارض

لا وكمان كل حاجا يقولولك بسم الله الرحمن الرحيم الخ الخ الخ ويقولو آيه من القرآن وبعدها يجيبولك كومبارس متكلم عامل نفسه دكتور وبيقولك خد الاعشاب دي وحلل بعد 21 يوم وهتشوف النتيجه

مع العلم ان الاعشاب دي مش معروف مصدرها ولا حتي جابو سيره وزاره الصحه ولا اي جوافه

دي حاجا تاني حاجا يجيبولك واحده وواحد بيقولو انا بيجيلي غيبوبه سكر وانا بصحي من النوم مش مركزه وهمدانا

طيب بالزمه حد سمع عن حد بيصحي من النوم يتشعلق في النجفه وينزل بعدها 10 ضغط

والله انا الي جالي الضغط من الحوارات دي

ده كمان بقي لو شفت شكل العلبه وهما بيعرضوها هتلاقيها متصممه علي البور بوينت ونوع البلاستيك بتاعه زي علبه مبيد الحشرات الي بيتباع في سوق السيده عيشه

مع احترامي ليهم كلهم طبعا ومع احترامي كمان للحشرات الي بتتعاطي المبيدات احسن تزعل هي كمان

بالله عليكم حد يقولي مين المسؤل عن الحاجات دي

تحياتي

هناك ٣٦ تعليقًا:

غير معرف يقول...

بص أنا ح أقول لك الحكاية آيه

ان الناس بيكونوا عوزين يتعلقوا بآى آمل و التجار طبعآ لازم يستغلوا النقطة دى ... أنا على فكره بقتنع بالعلاج بالأعشاب لكن مش فى كل حاجة لكن آكترحاجة بتستفزنى اعلان أعشاب مرضى السكر :( دى تجيب السكر للى مش عنده

مدحت محمد يقول...

انت تقريبا بتتكلم عن قناة الناس
رغم انها قناة دينية محترمة وبتجيب شيوخ محترمة
بس فعلا الاعلانات دى تفقع بجد
وكل حاجة يتاجرو بيها
يقولو ربنا قال
فعلا دى تجارة بالقران انا
معاك
تحياتى ليك

loza يقول...

اهلا تامر .. انا جيت على طول اهو ...
عموما دياما موضيعك حلوة وتستحق النقاش ..

اعتقد انك بتتكلم على الطب البديل صح ..!!!
انا مش خبيرة في الموضوع ده ومعنديش عليه معلومات كتير بس المفروض اي شخص لما ياخد اي حاجة يتأكد من صحتها ومصدرها ..مش يبلع والسلام هيه ايه ..


وانا عن نفسي وشخصي مبحبوش لان في الغلب طعمه وحش لا اكتر
...
وعن تجربة شخصية مره خدت دواء من النوع ده غصب والله وفضلت عليه شهر كامل والناس كلها كانت بتشكر في ...

وللاسف اعتقد انو هوه الي زاد حالتي سوء علشان كده انا بكره الادوية ده ... والعلاج بالطريقه ده ..

ده طبعا انا مبعنيش ان الحجات الي خلقها ربنا فيها فايدة .. وان ممكن نتعالج بيها بس اعتقد في لسه طرق احسن من كده ... والمفروض يكون في اثباتات على صحة كل حاجه .. مش زي معمولو معاية هتخدي يعني هتخدي ..

ربنا بقى يسامح ..
ههههههههههههههه
بس اهو لسة عايشة زي القطط بسبع ترواح ... مفيش حاجة نفعه فيه هههههههه
الحمد لله على كل حال

سلام يا كبتن ..

Unknown يقول...

الرقابة
مفيش رقابة اعمل الى انت عايزة ان شالة تبيع الهواء على انة دواء

Unknown يقول...

والله يا معارفه اقولك ايه ياتامر
لان الاعلانات دى بتحرق دمى بجد
خصوصا واننا دارسين الكلام ده وعارفين ان الكلام ده كدب فى كدب وملوش اى اساس من الصحه
وانما غرضه النصب والتجاره باحلام الناس
بس للاسف انا اول ما بشوف الاعلانات دى بجد صعوبه شديه فى اقناع حتى اللى معايا فى البيت ان الكلام ده كدب وبحاول اشرحلهم
رغم انهم والحمد لله مثقفين
امال الناس الغلابه بقى تعمل ايه
لو قلت ريان يا فجل
محدش هيقدر يصدق انه نصب لانهم متعلقين فى قشايه
وانا متاكده ان لو حد دور ورا مصادر الشركات دى هيلاقيها شركات وهميه
الكارثه انهم بيتاجروا تحت اسم الدين
حسبى الله ونعم الوكيل

تامر حسين يقول...

Sarah Daw
مع احترامي ليهم كلهم بس بردو يعني هل ده يعقل لما يقولو اعشاب من خيرات الطبيعه من غير حتي ميذكرو اسمها ربنا يهدي

doha
الحقيقه مش بتكلم علي قناه الناس
قناه الناس دي بيعلنو عن عبايات
انا بتكلم عن القنوات العاديه ركزي شويه هتاقي مش عارف مين تليشوب وتاقي علي طول الاعان ويكرو بقي بتاع اربع خمس اعلانات


loza

دلوقتي لما تاخدي نعناع عارفه بتاخدي نعناع عشان عندك مغص او ماشابه ولو خدتي بردقوش يبقي عشان تخسسي ولما تاخدي لمون عشان عندك برد او برتقال
انما لما يقولك من خيرات الارض يبقي ايه عصير برسيم ولا تراب نضيف انا عاوز افهم ده بجانب انهم حتي بيجيبو الاعشاب بالجرافيك
وتخيلي انتي بقي الاعشاب الي تعجبك
ده كمان عاملين اعلان عن واحد رايح يعمل انتر فيو وعاوز يخسس بسرعه عشان يكون حسن المظهر والاقيه كل يوم في اعلان لاحد الافلام طالع كومبارس ورا ريكو في ماتش كوره وهو بيغني
وبالقماره كمان محلقش السكسوكه عشان يتعرف بيها

ايوية

حلوه اوي دي بيع الهوا علي انه دوا تنفع مطلع اغنيه
حبيبي شفني واتلوي وقلبي ملوش دوا
قولتيلو ليه يا هوا
قالي ببيع الهوا علي انه دوا
ياسيدي عليا اجنن هههههههه
تحياتي ليكو كللللللللللللكوا

تامر حسين يقول...

لماضوتي

معلش وقعتي مني في التعليق الي فات

انتي جبتي المفيد بيتاجرو بالدين
وحسبي الله ونعمي الوكيل

وكمان بيقولوك السعر دايما 149 جنيه + مصاريف الشحن

البنت الشلبية يقول...

الاعلانات دى بقت منتشرة كتير فى القنوات الفضائية
واى حد معاه فلوس ممكن يعمل اى حاجة ويعملها اعلان بفلوسه
بس الناس مش هبلة
الناس فاهمة ان كل ده ملوش لازمة وان على الاقل بدل ما يروحو للدكتور بيروحو للصيدلانى
وربنا يسترها علينا كلنا

Yasser Hussein يقول...

إنهم يتاجرون بأحلام البسطاااااااء
حلوة البسطاء دي
:)
بس على فكرة الكلام ده مبيخش ع الشعب اللي دهن الهوا دوكو وعلم السمك العوم
:)
مصير اللي ماشي في سكة النصب دي يقع زي بتوع عسل النحل السدر الجبلي ما وقعوا .. والباقيين مصيرهم يقعوا

تحياتي

Doba يقول...

صباح الخيرات
مبروك شكل المدونة الجديد - النيو لووك مطلوب من ان لآخر برده

طبعا لازم البلاستيك يبقى مبيد للحشرات اللى هما الاطفال والسكر والضغط مهما بيعاملوها على اعتبار انهم حشرات

يلا اهو كله بيقلب عيشه
العيب مش عليهم - العيب عاللى فاهم وعارف زيك كده ويروح يشترى منهم

تحياتى
هبة

سها السباعي يقول...

مدونة جميلة ومواضيعها جميلة
الموضوع ده بالذات الواحد تعب منه
انا كنت باتابع القناة دي بس اول ما ابتدت الاعلانات تبقى بهذه الفجاجة ما بقتش اقربلها الا لما اكون عارفة معاد لبرنامج محترم فيها
اما موضوع الاعشاب ده فتم تجربته وجه المندوب وراينا العلبة راي العين ولما قلناله مش عايزين من منظر العلبة اللي ما يسرش قعد يفاصل معانا في تمنها لدرجة انه طلب تمن المكالمة اللي كلمهالنا عشان يعرف البيت فين وهوا جاي من الميدان وخد جنيه ومشي

تامر حسين يقول...

البنت الشلبية
كلام جميل بس المشكله ان تكاليف الاعلان اصلا كبيره جدا
عشان تتعرض وعشان تتصور
ده بجانب ان نفسي اعرف ازاي بيدو الحق في العرض دون وجود مستندات تثبت صحه المنتج

ياسر حسين

اديك قلت بتوع عسل الصدر
يعني انت عاوز تقنعني ان الي اخد الميديا دي عشان يعرضها مشفش اسم الشركه ومشفش عنوانها وكمان مقابلش مدير تسويقها
يبقي في الموضوع رشوه يمعلم

Doba
صباح الفل والورد
الله يبارك فيكي وبفكر كمان اعمل نيولوك للمدونه كمان مره وهصبغها اصفر كركركركر

حشرات بقي مش حشرات انا الي بقصده مدخلوش الدين كمان وآيات القرآن في الاعلان وانتو اول ناس عارفين انها اختراع فاشل
وربنا هيحاسبكم علي كل قرش
تحياتي

سها

شكرا ليكي ولردك واتمني منحرمش من ردك
تحياتي ليكو كلكوووووو

Coca يقول...

هما بس بيلعبوا علي حاجتين
اولا تدين الشعب المصري النسبي اللي بالفطره
ثانيا الغرقان اللي بيتعلق بقشايه

وفعلا اصح عنوان هو تاجره بالدين

Unknown يقول...

بجد مطلع اغنية خطير
ياريت تلحنة بقى

lolla يقول...

هاى تامر .. آسفة ع التأخير
احب فى الاول اقول مبروك على الديكور الجديد للبلوج بغض النظر عن الصور المرعبة اللى فوق دى لما شفتها اصابتنى بالقشعريرة الباردة .. حلوه دى؟؟ ههههههههههههههه

المهم .. احنا مش عاوزين نخلط الامور ببعضها
ايوه طبعا فى علاج بالاعشاب .. ومش بس نعناع وبردقوش وليمون .. فى علاج بأشكال وانواع من الاعشاب الى الان تحت الاكتشاف والتجربه .. وبالرغم من ان الكلام ده هيقطع عيشى بعد كده لاننا هنقعد فى العيادات نهش دبان لكن كلمة الحق برضه لازم تتقال

دى حتى الادويه دلوقتى اللى بتتعمل جديد بتتحط فيها تركيبات من الاعشاب الطبيعيه وهى اللى بتخليها اغلى بكتيير من الادويه التانيه

وانا نفسى بشجع العلاج بالاعشاب والعوده للطبيعه بدليل ان شركات الادويه دلوقت بترجع للاعشاب الطبيعيه فى الادويه

المشكله اللى عاوزه احط ايدى عليها ان الاعشاب زى ما ليها قدره علاجيه ممكن تكون فيها مواد سامه او مدمره لاجهزه الجسم.. وده اللى يدعو لإستخدامها بطريقه مدروسه.. ابسط شئ كميتها .. وتناسبها مع سن المريض وحالته الصحيه ووووو الخ

فالحاجات دى لازم تبقى تحت اشراف .. مش كل من هب ودب يعمل اعلان على الاعشاب وخلاص.. ويحسسك انه زى السحر .. الست قبل ما تاخد الاعشاب مبتخلفش .. وبعدها تجيب دسته .. يا سلام .. ؟

فلازم يبقى تحت اشراف خبراء ومتخصصين
ومين عارف يمكن تكون العلب دى مش اعشاب خالص وتكون عمليه نصب

وفى النهايه الشفاء بيد الله سبحانه وتعالى

واحب اشكرك يا تامر على مواضيعك الجميله الهادفه.. دايما بدخل مدونتك بستفيد
تحياتى

تامر حسين يقول...

coca
شكرا لزيارتك وشكرا لتأييد الاسم

ايويه
هههههههه
انتي صدقتي ولا ايه هي دي تتلحن ازاي دي ههههههه

lolla


اولا حلوه اوي حكايه القشعريره البارده دي
وكمان حكايه نهش دبان دي كمان هههههههه


ثانيا انا مش قادر اوصف مدي فرحتي من كلمه
واحب اشكرك يا تامر على مواضيعك الجميله الهادفه.. دايما بدخل مدونتك بستفيد
تحياتى

بجد الف الف شكر لرفع روحي المعنويه
تحياتي كتير ليكو كلكواا

simply me يقول...

السلام عليكم
نورت مدونتى يا تامر

وكمان مدونتك عجبتنى جدا وكل موضوعاتك لذيذه

تسمحلى اكون صديقه للمدونه
--------------------------------
فعلا انا شفت الاعلانات الهبله دى
وقلت منهم لله يضحكو على الناس الغلابه
واللى يغيظ بقى شكل الدكتور ابو لاب توب اللى قاعد يكلم -المهندس-وهايعلجو بالاعشاب
قال يعنى ناس بتفهم اهى وبتتعالج بالعشاب

هم فعلا ناس بتاجر باحلام الشعب الغلبان اللى مافاضلوش غيرها
كمان عايزين يسرقو احلامه
منهم لله
---------------------
سلام بقى هاروح اتفرج على باقى المدونه

truelove يقول...

اضم صوتي لصوتدوبا يا تامر ان العيب فعلا على الي عارف انه ده كله وهم وبرضه ماشي وراه ربنا يسهل وحد يطلع بطل همام ويطلع يقول ياجماعة ده كلام وبس كده منتظرينه بقى

خمسة فضفضة يقول...

السلام عليكم ورحمة الله وبركاته

شوف يا استاذ تامر نقابة الصيادله عندنا انبح صوتها في الموضوع ده
بس وزارة الصحه لا حياة لمن تنادي ، تحس ان الناس فيها متظبطين ولا ايه... الله اعلم

وسمعنا عن ناس من دول اتقبض عليهم وشركات طلعت وهميه ، بس لسه الاعلانات زي ماهيه حتي اعلانات نفس الشركه دي موجوده علي كل الفضائيات


وربنا بقي يتولي الناس الغلابه اللي مش لاقيين حد يدافع عنهم ولا يحميهم من النصب ده


تحياتي

Unknown يقول...

الموضوع فعلا مهم جدا وز خطير المتاجره بالدين و هموم الناس دي حاجه صعبه اوي
بس فين الرقابه علي الاعلانات دي

Tamer Nabil Moussa يقول...

مدام مفيش رقابة

ولاتفتيش

ولا حد يهتم ويبحث

يبقى لازم تنتشر الحاجات دى

تحياتى

Unknown يقول...

الحمد لله على نعمه الريموت و قدامك تغير القناه وقت الاعلام او تطنش خالص

الحمقاء المضلله innominate x يقول...

على فكرة دي مسخرة و مع الأسف الناس الي بتصدق كتيررررررررررر الجهل بقى منتشر قوي و ناس كتير قوي بقيت تروح تشتري و إلا مكنش الشركة المنتجه يبقى معاها فلوس تعمل الإعلانات الضخمه دي و على فكرة المفروض القنوات المحترمه ترفض عرض تلك الإعلانات حفاظا على مصداقيتها صحيح في فلوس داخله للقناة بس ده على حساب سمعتها و مصداقيتها

MAKSOFA يقول...

كل ده كلام فارغ وموش عايزة أقول كلمه تانيه لحسن تقول عني قليله أدب


ربنا خلق الداء والدواء
والزمن بيتطور وموش معقول اللي الطب عاجز عنه تداويه شويه أعشاب هبله

loza يقول...

انا مبتكلمش عموما على البردقوش والنعناع ... لا طبعا ...

مهو انت مشعارف انا شربت ايييييييييييييييييييه ... الله يسمحهم بقى ..
والاخت للولا بتأيد الموضوع يا سلام باذن الله هتعيش بطالة البنت ده اذا مشي الموضوع زي ما هيه بتقول ... يا حرام ناويه تقطع عيشها ...

يلا وجعنالك دماغك ...

بس أنا معاك في ان لازم نعرف الحاجه ده ايه وفايدتها ايه ... وهل في منها ضرر أو لا ... واكيد ..ده بيأيد كلام للولا لما قالت ان لازم يكون تحت اشراف أخصائيين ... مش سبهلله ..والا علشان طلع عمو مشعرفه مين هوه في التلفزيون وقال عليه يبقى فيه السحر خلاص ده أكيد مش هيكون كلام مزبوط ...

تحياتي يا كبتن ... ووصي الاخت للولا متخربش على روحها ..

ههههههههه سلام الى حين اشعار آخر

lolla يقول...

عفارم عليك يا باشا

وايه كابتن دى .. انت بتلعبى كوره

طب حاسبى احسن هيدخل فيكى جون
ههههههههههههههههههههههههه

شكرا يا تامر على كلامك .. بجد المدونه بتاعتك دى راااائعه مش مجرد رفع معنويات
انا حتى مبعرفش اجامل
تعيش وتفيدنا يا فندم

تامر حسين يقول...

يا جماعه
مش عارف ارد علي مين ولا مين بس بجد انتو كلكو عندكو حق في كلامكم ولازم هيكون في اختلافات ونقاشات بس المهم في الاخر الحل ايه
في صديق عزيز قالي الريموت ممكن نغير بيه القناه وفي الي قال الاعشاب تحت اشراف طبيب وفي اراء كتير المهم كلامنا يوصل لحد مسؤل مش اكتر ويؤخذ فيه اجراء فعلا مش كلام وبس وا انا غلطان
سامحوني ازا كنت مزعل حد مني ومتسامحونيش لو مزعلتش حد منكم هههههههههه
تحياتي ليكو كلكم وربنا يوفقني وابسطكم كمان وكمان
تحياتي ليكو كتيييييييييييير

Radwa يقول...


هههههههههههههههه
موضوع حلو

اسلوبك ساخر ثائر رائع شكلك مفقوع مرارتك

بس انت بتقول لمين الكلام دا الناس يا بنى ما بتصدق حاجه تبعدهم عن الداكتره والاشعه والتحاليل الصيدليه والدوا او اى حاجه هيدفعوا فيها فلوس وخاصة الناس الجهله لان المتعلمين عارفين بس انت بقى بتنقد التليفزيون الناس دى ولا بتنقد الشعب

تامر حسين يقول...

بنقد الشعب ايه بس انتي عاوزه تفليلي المدون وتكرهي الناس فيا
لا طبعا انا بنقد التلفزيون الي من غير رقابه وكمان بنقد الناس الي بيمشو ورا الكلام ده مش الشعب
لامؤخذه يا شعب
تحياتي

NeRmeeN يقول...

ههههههههه فعلا الاعلانات دى انتشرت اوى ..حاجة مستفزة اوى...ولازم يجبولك الموديلز محجبات..ولا الاعلان الفقع بتاع ...انسولين انسولين مازهقتوش من الانسولين..والعسل الجبلى...بجد حاجة تفور الدم!!!!!!

لك الله يا شعب مصرررررر
تحياتى

loza يقول...

معلش تامر بس ازاي هيوصل الصوت ده ..
؟؟؟؟

الميكانيكية يعني .. !!!!!

انا اتمنى بس في شيء ممكن نعمله ..
يعني المطلوب عيزين فكره ومعتقدش حد
هيتأخر في التنفيذ ...
والا هوه في خطه من ورانا ...اها
هههههههههه عموما انت شاور بس وكلنا وراك ...
هههههههههه
نحن في الخدمه في ايتها وقت ..

تامر حسين يقول...

نرميين

يعني هي جت عالانسولين
مشفتيش البنت الي كان نفسها تبقي موديلز وبتلبس الطرحه قدام جوزها مع انها موديلز اصلا او ممكن تكون صاحبه بنت صاحب الشركه او المخرج هههههه
يالله لنا الله جميعا

لوزه

ماشي يمعلمين اول محب اشاور هشاور
بس يارب متجروش ورايا وتقولو حرامييييي
هههههههه
تحياتي حاتي باتي

الخيط الرفيع يقول...

اولا سلام عليكم
الموضوع دا بجد خطير وكنا في شغلنا بنجهر حالات اتضرروا من الاعلانات دي وبجد كتير وحالهم مزري فعلا
ناس الاعلانات دي دمرت حياتهم
بس للأسف اخويا الكريم النصب في مصر لا يجرم الا علي ناس ناس
يخلوهم يبطلوا اعلانات شهر ويرجعوا اصعب من الاول

تامر حسين يقول...

الخيط الرفيع
عندك حق والله وحسبي الله ونعمي الوكيل فيهم
تحياتي

مشمش يقول...

مهما تقول هيفضلو في العبط دة عشان بيلاقو الي يصدقهم ويشتري منهم بمبالغ عبيطة وكمان محدش بيقولهم بتهببو اية ووزارة الصحة دي معمولة عشان بس يتحط قدام الباشا ورقة كل سنة عشان الميزانية بتاعتها بركة يعني كتهم القرف ملو البلد

ٍSOU يقول...

اييييييون هو دة اللى لسة كنت بقولة لماما من كام يوم.. اعلانات ركيكة ..يعنى العبيط يعرف انها اشتغالة